Boazodoallu | Seiland nasjonalpark

Boazu lea leamaš Sievjjus maŋemus jiekŋaáiggi rájes, ja dat gullá sullo ekovuogádahkii. Doloža rájes leat bohccot vuodjan nuori rastá giđđat geasseguohtumiidda ja čakčat ruovttoluotta. Dál suvdet bohccuid prámáin, dahje fievrredit guorbmebiillaiguin feargga mielde davágeahčái Sievjju. Eallu olle Sivjui giđđat ovdal guotteha, ja orru Sievjjus geasi miehtá dain álbmás guohtumiin mat doppe leat. Dáid bohccuid dálveguohtun lea Sis-Finnmárkkus. Maŋemus jagiid leat davágeaži orohaga bohccot orron Sievjjus birra jagi. Danne sáhtát maiddái dálvet oaidnit bohccuid dáppe.

Sievjju bohccot čakčat. Govven: Per Arne Askeland

Govven: Marit Helene Eira

Govven: 1 Sievjju bohccot čakčat. Govven: Per Arne Askeland Govven: 2 Marit Helene Eira

Boazodoalus leat vuodjinlahtut álbmotmeahci lulá-nuorttageahčen. Govven: Ingunn Ims Vistnes

Sáhtát máŋgga sajis vuohttit boazodoalu. Dat sáhttet leat vuodjinluottat, áiddit ja gárddit, ja soames guođohanbarta.

Boazu lea sivdniduvvon johtalit dálve- ja geasseguohtuneatnamiid gaskka. Sievju lea bohccuid geasseparadiijás, ja lea deaŧalaš ahte boazu geasset borrá bures Sievjjus, vai buoidu ja čohkke vuoimmi vai ceavzá guhkes, garra dálvvi. Giđđat ja geasset guohtugoahtá boazu vuos rahtáid, mat leat vuosttaš ruoná šattut mat ihtet dađi mielde go muohta suddá ja dasto manná boazu geasi mielde dađistaga badjelii vilttiide ja váriide. Báhkka geassebeivviid manná boazu hui bajás, dahje báikkiide gos bieggá, vai beassá earránassii divrriin ja beassá ráfis guohtut. Go nu dahká, de dadjat ahte boazu bálgá. Dábálaččat eai leat bohccot čoahkis geasset, muhto lávdet miehtá smávit čoran.

Boazočora árrageasi. Govven: Ingunn Ims Vistnes

Álddut ja miesit guhtot muosis. Ale mana lahka! Govven: Ingunn Ims Vistnes

Go oainnát bohccuid

Lea hui hávski oaidnit bohccuid. Go muittát čuovvovaš njuolggadusaid, de it muosehuhte daid:

Veatte beatnaga báttis. Boazu sáhttá navdit ahte beana mii ruohttá, lea várálaš boraspire mii lea bivddus. Áigodagas 01.04. – 20.08. galgá beatnaga veaddit báttis. Maiddái earret dan áigodaga lea dus geatnegasvuohta diehtit gos du beana lea. Luovos beatnagat sáhttet leat giksin sihke bohccuide, sávzzaide ja eará elliide.
Garvve bohccuid mat leat guohtume
Čegŋet ja vuordde dassá bohccot leat mannan dobbelii jus čora boahtá du guvlui
Giđđat leat bohccot erenoamáš hearkkit maŋŋel garra dálvvi, ja go unna miesážat šaddet. Jus áldu ballá eret miesis, de sáhttá miessi jápmit dahje borahallat. Go giđđat deaivvat bohccuid, de galggat bisánit ja árvvoštallat gokko sáhtát mannan nu ahte it baldde daid. Soaittát berret jorggihit ja mannat eará saje.