Doloža rájes leat bohccot vuodjan nuori rastá giđđat geasseguohtumiidda ja čakčat ruovttoluotta. Dál suvdet bohccuid prámáin, dahje fievrredit guorbmebiillaiguin feargga mielde davágeahčái Sievjju loahpageahčen cuoŋománu. Eallu olle Sivjui giđđat ovdal guotteha, ja orru Sievjjus geasi miehtá dain álbmás guohtumiin mat doppe leat. Čakčamánus čohkkejuvvo eallu gárdái ovdal go suvdojuvvo nannámii, ja dalle lea oalle olu aktivitehta váriin. Muhtin jagiid čohkkejit ealu maiddái suoidnemánus, mearkungárdái. Eallu suvdojuvvo nannámii golggotmánu álggus, ja dolvojuvvo dálveguohtumiidda Sis-Finnmárkkus. Soames boazu sáhttá báhcit sullui dálvvi badjel, ja muhtin jagiid leat davágeaži orohaga bohccot orron Sievjjus birra jagi. Danne sáhtát maiddái dálvet oaidnit bohccuid dáppe.
Govven: 1 Sievjju bohccot čakčat. Govven: Per Arne Askeland Govven: 2 Marit Helene Eira
Boazodoalus leat vuodjinlahtut álbmotmeahci lulá-nuorttageahčen. Govven: Ingunn Ims Vistnes
Boazu lea sivdniduvvon johtalit dálve- ja geasseguohtuneatnamiid gaskka. Sievju lea bohccuid geasseparadiijás, ja lea deaŧalaš ahte boazu geasset borrá bures Sievjjus, vai buoidu ja čohkke vuoimmi vai ceavzá guhkes, garra dálvvi. Giđđat ja geasset guohtugoahtá boazu vuos rahtáid, mat leat vuosttaš ruoná šattut mat ihtet dađi mielde go muohta suddá. Báhkka geassebeivviid manná boazu hui bajás, dahje báikkiide gos bieggá, vai beassá earránassii divrriin ja beassá ráfis guohtut. Go nu dahká, de dadjat ahte boazu bálgá. Dábálaččat eai leat bohccot čoahkis geasset, muhto lávdet miehtá smávit čoran.
Boazočora árrageasi. Govven: Ingunn Ims Vistnes
Álddut ja miesit guhtot muosis. Ale mana lahka! Govven: Ingunn Ims Vistnes
Go oainnát bohccuid
Lea hui hávski oaidnit bohccuid. Go muittát čuovvovaš njuolggadusaid, de it muosehuhte daid:
- Veatte beatnaga báttis. Boazu sáhttá navdit ahte beana mii ruohttá, lea várálaš boraspire mii lea bivddus. Áigodagas 01.04. – 20.08. galgá beatnaga veaddit báttis. Maiddái earret dan áigodaga lea dus geatnegasvuohta diehtit gos du beana lea. Luovos beatnagat sáhttet leat giksin sihke bohccuide, sávzzaide, lottiide mat bessejit eatnamis ja eará elliide.
- Garvve bohccuid mat leat guohtume
- Čegŋet ja vuordde dassá bohccot leat mannan dobbelii jus čora boahtá du guvlui
- Giđđat leat bohccot erenoamáš hearkkit maŋŋel garra dálvvi, ja go unna miesážat šaddet. Jus áldu ballá eret miesis, de sáhttá miessi jápmit dahje borahallat. Go giđđat deaivvat bohccuid, de galggat bisánit ja árvvoštallat gokko sáhtát mannan nu ahte it baldde daid. Soaittát berret jorggihit ja mannat eará saje.